No gh'è ne la storia
Del mondo una festa
Più bela, più splendida,
Venezia, de questa:
De re e imperatori
Delizia, martirio
De artisti e scrittori,
Superba memoria
De un tempo passà.
Inutile invidia
De cento cità!

A l'ultimo ragio
Del sol che se sconde,
A l'aria che alzandose
Dal mar ghe risponde,
Se sventola in gringola,
Più alegri, più bei,
Se sbate, se intòrcola
Damaschi e tapéi:
Su l'alto patrizio
Balcon destirà
Se dondola in boria
L'arazzo fruà.

Da barche, da sandoli,
Da rive e pontoni,
Sporgendo dai pergoli,
Strucài sui balconi
De veci e de zoveni
De mare e fradei,
De spose, de sàntoli
De none e putéi
Per tuto de popolo
Un'onda, un tapèo,
Che varda, che spàsema,
Che segna col dèo.

Sbassai su le forcle
Dei so gondolini,
Su l'aqua che palpita
Sbattendo i scalini,
I svola in t'un impeto
De schene e de brazzi
Traverso el miracolo
De cento palazzi;
I svola fra un nuvolo
De piume, de fiori,
De sede, de stràssini
De veli, de ori.